Цыганский ансамбль "Амэ Рома"
("Мы цыгане")
Выступление на концертах, корпоративных праздниках, банкетах, свадьбах, юбилеях, гастроли в России и за рубежом.
8(903)247-99-34Профессиональные музыканты, в том числе джазовые музыканты, артисты различных жанров и направлений, профессионалы от Содружества московских музыкантов выступают на праздниках и банкетах.
На фуршетной части праздника актуальны классические музыканты, чаще всего приглашается струнный квартет - две скрипки, альт и виолончель.
На праздниках всегда актуален ведущий праздника. Если это мероприяти свадьба, банкет или день рождения, то ведущего можно назвать тамада, но это определение все меньше и меньше употребляется в среде профессионалов.
Если ваше праздничное мероприятие прходит на улице, то вам наверняка потребуется духовой оркестр. Если праздник имеет официальные атрибуты, то, конечно, это должен быть военный духовой оркестр.
Меню сайта
Наш опрос
Вход к цыганам!
Поиск
Статистика
Онлайн всего: 1
Гостей: 1
Пользователей: 0
| Главная » Статьи » Стихи и проза цыган. |
БУРДА
- Миштыпэн акана ваш састякирибэн, - пхэндя учи пэса романычяй. - Биловэнгиро тэ чячюнэс састякирна! - Сарэ дукхандыр ёнэ лынэ тэ састякирэн: и э тырдынендыр, кои тырдэла, тэ и матыбнастыр, - взагыя дро ракирибэ тэрно романочяво, савэстэ сыс пирипхандлы дыкхлэса шувлы чямлин. Пхурором запия э пипка тэ пхэндя: - Катыр амэ э састыпнытконэн джиндям. Лэн и на джиндям тэ и на приґалёвавас. Кэрибнаскирэ тэ мамья э рашанца састякирнас драбэнца тэ чярьенца, нэ и приракирибнаса. - Тэ и высастякирнас? - сабнаса пучья тэрно чяво. Пхурором засандяпэ, подыкхья прэ сарэндэ тэ пхэндя: - Пхаро сыс ґарыдыр... Мануша самас дылынэ, на роскэдасаспэ ни дрэ со. Пхурором дыя гондя, лыя тэ выбулавэл састырорэса кирки пипкатыр, вздыкхья прэ ромэндэ, савэ шундлэ лэс сарэ дёса, тэ лыя дурыдыр тэ роспхэнэл: - Лодыя дрэ амаро таборо екх ром, кхарнас лэс Бурдаса. Пия ёв на умор адая розбисчястно мортвалы, сыр паны. Саро пэстыр пропия, э ромнятыр Матихатыр остатно индырака стырдыя. А окоми Матихатыр сыс лэстэ инкэ чяворэн штарджинэн, екх екхэстыр тыкныдыр. Нэ, а бесчясть романы, вестимо уж джинэл кэ кон тэ припхандэлпэ. Ёй камэл адасавэ манушэн хасибнаскирэн. И адякэ уж Матиха чяворэнца мэнчисалыя э Бурдастыр, тэ и кокоро ёв хачия э мортвалятыр, а адай сыр про грэхо, лэ тэ мурдёв лэскиро грай, цыпо остатно, вокурат кэ вэсна. Пирирундяпэ э Матиха, а со жэ тэ кэрэс: тэ кинэс ваврэс нанэ прэ со. Нэ... Токо со лыя тэ зджял о ив пхувьятыр, о кхаморо лыя тэ татькирэл пиримразалы пхув, кое-кай выгыя зэлэнинько чярори, - амаро о Бурда потырдыя прэ пэстэ пхагло урдэн. Дуй тыкнинька чяворэ бэштэ сыс про урдэн, а дуй побарыдыр прастандынэ палал палэ Матихатэ, сави сарэ зорьятыр поможындя э палуестыр тэ тырдэл урдэн. "Тэ захасёл тыро кало шэро тырэ псикэндыр, тэ тэ залыджял тут мандыр балваляса тырэ бибахталэ э джиибнаса, дикхэс жыко со домардямпэ - ко вэшытко дэсторо". - Костяпэ Матиха. - "Дикхэс, нанэ прэ со урдо тэ вытырдэс ирьяса дрэ фэлда. Саро пропиян. Сави тутэ бари кужум исы, кхандуно матымари". Кое-сыр дотырдынэпэ кэ фэлда, Матиха росчидя э шатра, сыды мэлалэ гонытконэ похтанэндыр. Прикэдыя ёй дрэ шатра... А котэр маро нанэ. Чяворэ роиндой мангэна тэ хан, тэ и Матихатэ дро пэр бурлинэ. Бурда лыя э вэнда дро васта, тэ и гыя пэскэ тэ старэл мачен прэ рэка, сыр будто и нанэ лэскиро рэндо, со ровэна чяворэ. Э Матиха чюрдыяпэ прэ лэстэ тэ кошэлпэ. "Морэ, бибахтало ту машуш. Сыр тутэ о якха-то дыкхэна про парно свэто би ладжяибнаскиро? Карик тут о вихро лыджяла? Мэк тэ отшутён тырэ васторэ тырэ псикэндыр, коли ту лэса тэ старэн мачен. Тэ со жэ аль фэлы тэ чёвав прэ пэстэ". А о Бурда и о муй палэ на дыя, отгыя криг э шатратыр. Матиха подчёдя э подя тэло гофи тэ гыя тэ псирэл пиро гава. Прэ лакири бахт джиндя дро гав банзарька, зоралы тэ грубо пэса дандвари. Можэ стать лакэ уж тэло панджвардэш бэрш исыс, а са-таки камья тэрнэ муршэн тэ придрабакир. Нэ и уґалыя пал латэ Матиха. Э ромны на сыс дылыны. Подыяпэ кэ ёй, злыя ла про драбакирибэ, дылнякирдя адалэ дандваря, фрэнтонэ лавэнца замардя лакэ о шэро. Дыя драборо лакэ камлыпнастыр, позумадя про патря, сыкадя э страх дро парнинько тэ и выхохадя дылынэ банзарькатыр биш састэ, са руповэ састэнца. Нэ и кэ рат токо рисия Матиха палэ кэ шатра. Э радатыр ґэра тэл пэстэ на шундя гыи дромэса. Дро шэро екх дума сыс латэ. "Эх, коли-бы тэ кинэл грасторэс, тэ откхинэл дромэстыр". Бурда пашло сыс прэ порныца упрэ пэрэса тэ дыя шоля дро накх, сыр пхурано грай. Пашыл лэстэ чюрдыны сыс э вэнда. На прогыя и пашмардо, сыр пашыл бари яг розлыджимэ бэштэ сыс Бурда э ромняса, - дрэ саструны пири татыя паны, дрэ яг пэтинэ пхувитка. Тыкнэ чяворэ роиндой тэрдэ сыс пашыл яг, мангнэ э датыр тэ похан. На пхэндя Матиха вашо сталя Бурдаскэ - дарандыя, со отлэла тэ пропьела лэн: "Мри ромные, сари ак адая ратори дыкхьём мэ сунэ э грастаны пори, хай, дро васта рикирава, - пхэндя о Бурда. - Кэ со адава? Аль ваш адава, со о грай мирэ шэрэстыр на выджяла. Палэ грэстэ саро шэро нашадём. Са думинава, саво ґара мандэ на сыс... Эх, э бида прэ миро шэро кало, саро колын повышутия, ромные..." Пхарэс кэрдяпэ Матихакэ, ажно ґондя дыя э ромэскирэ лавэндыр. Танго лэс ачья, гыя вастэса палэ брэк тэ вылыя руповэ састэ, сыкадя ромэскэ. "Тэ катыр адава тутэ, мри масхари? - задыя годла о Бурда. - Аль про кладо попыяп? Дэка адарик, ян мангэ, шшёдриво тыро муй!" "На, мро дадоро, - холямэс пхэндя Матиха и загарадя сталя. - Мэ на рисёл э цыпа прэ тутэ. Адасавэ сталя токо екхвар дро дэш бэрш попэрнапэ. Окэ коли камэса; авэн кхэтанэ манца тэ кинэс э грэс. Токо ангил мандэ кинэса. Тукэ дро васта сталя на дава..." Бурда захарудя дро шэро. "Нэ шукар, мэк явэла пиро тыро," - здыяпэ прэ лакирэ лава ёв. Токо со свэто лыя тэ парнёл про болыбэн, ёнэ сарэ дуйджинэ гынэ про гав тэ кинэн э грэс. И мардэ пирдал дуй пиро дром ко шатри гыя уклисто прэ грэстэ Бурда, а э Матиха гыя прэзал палал пал лэстэ, прэ лакиро муй кхэлдя э рада. Рома сарэ шатрэндыр повыгынэ тэ роздыкхэн киндлэ ґэнштос. Обкрэнцакирдэ ёнэ сарэ стронэндыр Бурдас э грэса. Сар дынэпэ э завидоскэ, кай ёв адасавэ грэс дорэстя? Бурда мардя грэс чюпняса пиро пангалья тэ шардяпэ пэскирэ муршыпнаса э ромэнгэ, коли Матиха угыя дрэ шатра тэ кэравэл о хабэн. "Морэ, трэби тэ чювэс о литки," - пхэндя екх ром, - "тэ обморэс тырэ ґэнштоскирэ ная ваш э бахт тэ талано". "А коли на чювэса, так на явэла бахт дрэ тырэ грэстэ," - подпхэндя вавир. О Бурда и рада тэ приячел кэ адалэ лава. Нэ и киндя э мортвалы о Бурда и запия ромэнца. Нэ, выпинэ рома, подматынэ тэ и лынэ екх ангил екхэстэ тэ шарэнпэ грэнца, лынэ тэ выкхарэн тэ традэнпэ прэ грэндэ! Сыр про грэхо грай попыяпэ адасаво Бурдаскэ, со сарэ ромэнгирэ грэн обтрадыя. Окэ и лыя пало ило Бурдаскиро грай залихонэ кофарис. Гыя ёв про фрэнтыма, закхардя Бурдас кэ пэ дрэ шатра, подматькирдя, нэ и залыджия лэса тэ парувэл а грэнца. Матиха роиндой про чянга мангья тэ отджял ромэс криг, тэ на парувэл матэ лакирэ ромэса, нэ прэ лакирэ лава и тэ чюнгардэн на камнэ ни о Бурда, ни о ром кофари за-лихо. Нэ и вымардя о корнё ром кофари залихо матэ Бурдаскэ, выпарудя лэстыр ґэнштос, а лэскэ отдыя цыпос би ґэрэнгирэс тэ и корорэс грэс. Зоралэс задуминдяпэ э Матиха, коли удыкхья, савэ грэс выпарудя о Бурда, а одолэскэ и э бахт на трэби: махнискирдя ёв вастэса, бэстя уклисто прэ цыпостэ тэ угыя криг э шатратыр. Тэ токо ратяса прэзал рисия кэ шатра кое-сыр про ґэра тэрдо мато. Дыяпэ муртык накхэса дрэ порныца тэ сыр гурув мычиндя. "Кай грай?" - лыя тэ дэл кунде Матиха Бурдас дро псико, - "Кай жэ о грай?" А Бурда са мычиндя тэ отчюнгардыяпэ. Напэскирэ глосяса задыя годла Матиха. "Хасиян бишшясно, о грай! Дэвлалэ-э-э..! Тэ адякэ задыя годла, со сарэ шатрэндыр спрастандынэпэ о рома, обкрэнцакирдэ э шатра. Подыкхнэ, подыкхнэ ёнэ тангипнаса прэ латэ и розгынэпэ кэ пэ. Нэ со жэ тэ кэрас? Про вавир дывэс подгыя кэ Матиха пхури ромны тэ и ракирла: "Нэ со ровэса, дылыны! Трэби тэ састякирэс тырэ матымарис..." И роспхэндя ёй Матихакэ, со сы надур адай екх пхури - рашаны, сарэ бидэндыр састякирла э порошкэнца тэ чярьенца. Матиха пришундяпэ. А пхури ромны сыр шанг про кан проракирдя: "Кряду тырэ матымарис высастякирла. По трин вэрсты ко мортиалы на подджяла..." - А кай ёй дживэла? - пучья Матиха скрозь ясва. - Пашыл кхангири. Пуч рашаскиро кхэр, каждо мануш тукэ пхэнэла," - сыкадя пхуромны дрэ строна про гав. Нэ... Чють свэто гыя Матиха кэ рашаны, дро дыкхло зарискирдя "тринэнгири". Рашаны бэшты сыс кэ фэнштра, росчидя патря про чянга пэстэ. Рашас на сыс кхэрэ. Роспхэндя Матиха рашанякэ пал пэскири бида, мангья тэ поможынэл тэ высастякирэл Бурдас матыбнастыр. "Тэ поможынав могискирава", - пхэндя рашаны, - тэ со жэ ту нангэ вастэнца явэса?" Коли ту тэ явэс мангэ, дай аль пхэн". Екхатыр вытырдыя э Матиха остатно "тринэнгири" дыкхлэстыр. "Окэ тукэ, токо высастякир! Хасёваса э тыкнэ чяворэнца лэскирэ матыбнастыр!" Лыя э рашаны "тринэнгири", подыкхья про свэто - нанэ ли харкуны, прочиндя прэ латэ сарэ номеры, и сыр подчиндло исы, окоми на хачимэ стходя ла, тэ и загарадя кэ пэ дрэ панчёха. "Пьела, ракирэса, тыро ром," - обрисия лавэса э рашаны кэ Матиха. "Пьела, пьела", - зарундя Матиха. "Адякэ", - протырдыя скрозь данда э рашаны и лыя со-то тэ родэл дро комодо. - "Окэ тукэ э свэнтонэ книгатыр э молитва". Э рашаны чюдя дро васт Матихакэ клокицо лылоро и тихэс проракирдя: "Бельвеляса, коли о кхам попаш збэшэла кэ пхув, лэ тэ и схачкир прэ бари яг адая молитва, а э праска латыр чюв дрэ мусэр панеса, тэ дыкх одоя мусэр, савьятыр тыро ром пия мортвалы, нэ и чюв прэ рат лэскэ ко ґэра". "Адяк, адякэ, саро кэрава", - пхэндя Матиха, - Ракирэса тэло шэро?.." "Нэ, а про злоко, прэ зоря чюп мортвалы дрэ адая само мусэр; нэ и подлыджя лэскэ тэ выпьел... Тэ адякэ, собы ёв саро драб тэ выпьел, полыян? - "Саро собы?" - пирипучья Матиха латыр. "Нэ пало одова на трэби шэро тэ пхагэс. Лэскэ хош пандж адасавэ мусэра чюв, нандырша, на похарувэла и дро шэро, выпьела, тэ и набут авэла. Кэ бульвель жэ дорэс бари душлы мортвалы тэ чюв ла ангил лэстэ", - сыклякирдя ла рашаны, - "а кокори уджя, тэ и на дыкх прэ лэстэ...["] "Нэ, а окоми?" "Явэса, а э душлы на явэла чилады. Э капля на прилэла ди лэстэ. Молитва саро оттрадэла". Радаса угыя Матиха а рашанятыр, на джиндя, сыр и тэ паракирэл ла. Про колын латэ сыс загарады а цэлебно молитва. Саро кэрдя Матиха, сыр припхэндя рашаны, ничи на забистырдя. Сыр задивисалыя Бурда, коли Матиха, са кэрдя лэс арманя пало пибэ, а адай кряду э злокостыр, инкэ ёв якха на протриискирдя, подыя лэскэ пхэрды мусэр мортвалы. Э барэ радаса вчидя ла Бурда дрэ пэскиро кирло, на подыкхья, со дрэ латэ савэ-то калинька котэрорэ, и ёв радатыр ажно дыя пиро Матихакиро псико. "Ґара бы адякэ-то". - пошардя ёв ла, - "палсо сыс тэ кошэспэ-то!" "Мишто! - подуминдя э Матиха. - "Тукэ адая э мортвалы килэса дро кирло тэрдёла". Инкэ бутыр здивиндяпэ Бурда, коли бельвеляса яндя Матиха пхэрды душлы тэ и чюдя ангил лэстэ. "Акэ, пи! Галёв шэро дукхала!" - Пхэндя ёй, тэ надыкхи прэ Бурдастэ угыя. Адасаво ковлыпэн э ромнятыр Бурда уж бэрша биш на дыкхья. Обдылнымэ дыкхья ёв дро слядо Матихакэ. "Уж на ли имениннико мэ ададывэс," лыя ёв тэ взрипирэл. Ничи на придуминдя о Бурда, счюнгардыя тэ здивисалыя, откардя остатно душлы тэ и посунгья. Бельвеляса рисия Матиха кэ шатра. Инкэ э дурипнастыр ушундя ёй маты глос Бурдаскири. Упыя о ило э Матихатэ. Завоёса, савэса багандя о Бурда, Матиха полыя, со ёв мато, сыр патаво. На патяндыя пэскирэ канэнгэ э Матиха и тихэс подгыя кэ шатра. Кое-сыр влэчискирдя о ґэра, подгыя о Бурда кэ Матиха, махыскирдя пустонэ душляса! "Екх ту ман полэса", - зарундя ёв. - "Дэ инкэ э мортвалы...'' На рипири пэс э холятыр, ухтылдя Матиха э Бурдас пало бала тэ дыя кунде дрэ пхув чекатэса. Бурда ревиндя сыр гурув, нэ на сможындя тэ отрискирэлпэ э пхувьятыр. Протриискирдя накхэса пхув ко дуй аршыны, и ёв успокоиндяпэ тэ и засутя. Сари рат на засутя Матиха, са кокори пэса ракирдя, костяпэ, кэрдя арманя э рашаня адакицы молы, со ухтыллас прэ сарэ рашандэ, про саро парно свэто... Прэ вавир бельвель, тэло куркитко дывэс, коли дрэ кхангири дылнякирдя о рашай манушэн, савэ патяна дрэ дэвлэстэ, э Матиха явья кэ рашаны кэ штуба. Екхатыр обдыкхья э штуба тэ и подыкхья про скаминд, кай сы стходы "тринэнгири". "Мири ґалёв," - подуминдя ёй. Шылалэс подыкхья э рашаны прэ Матихатэ. Матиха росхачия сари дро камло сабэн, заракирдя ёй барэ радаса: "Авьём тэ пиридав тукэ, мри даёри, амаро романо гудло лаворо, палодова, со поможындян". "Аль пириачья тэ пьел тро роморо-то?" - Пучья э рашаны, ушуны лаче лава э Матихатыр. "Сыр вастэса злыя". "Свэнто молитва коли-ками поможынэла". "Тэ окэ, мри рашаны", - лыя тэ ракирэл э Матиха, мэ и кокори сом драбакирибнаскири, ман джинэн пиро саро парно свэто... Мандэ о дандваря-то пало чён дро англуй позачиндлэ сы, нисыр лэндыр тэ на отмаравпэ. Хош дрэ пхув гарадёв лэндыр... "А прэ со жэ ту драбакирэса,["]- заинтересалыя э рашаны. "Прэ со ками. Пало камлыпэ, прэ дукх, конэстэ со чёрдэ - латхава..." "Адякэ, адякэ," задуминдяпэ э рашаны, са бутыр тэ бутыр заинтересалыя Матихакирэ лавэнца. "Нэ окэ сыр пиро ромэнгирэ рэнды?" "Пиро буты со ли?" "На, пиро семьмтко рэндо". "Нэ роспхэн, роспхэн мангэ". Рашаны подбэстя инкэ пашылыдыр кэ Матиха тэ про кан лыя тэ роспхэнэл: "Бэрша мирэ хош и набарэ, а са-таки ведь на сом раклори мэ... Дыкхэс, ростхулыём мэ набутка, про шов пуды лыя тэ тырдэл, нэ а миро то кя камэл шукэ джювлен... "Адякэ, адякэ," - подпхэндя Матиха э рашанякэ. "Мэ шундём, будто ёв подмарлапэ кэ кузнецоскири ромны, одова чястэс дро форо уджяла..." "А", - вздыя годла э Матиха, " - пропарудя, так адава ваш мангэ тэ чюнгардав екхвар. Саро роспхэнава сыр пиро чиныбэн". "Нэ, на хохавэса?" - Захачия ажно радатыр э рашаны. - Пало одова, со ту ромэс мирэс матыбнастыр высастякирдян, мэ тукэ, со камэс уґалёвава", - пхэндя Матиха. - "Паны тэ вангара исы?" "Исы, исы", - запрастандыя пирэ штуба рашаны. Пирдал мэнта дро мусэр панеса шуминдлэ о вангара. Матиха долгэс дикхья дрэ мусэр тэ риманэс костя э рашаня. Сари пэскири холы вычюрдыя, а кокори думиндя: "подужакир, мэ тукэ сыкавава, сыр тэ обхо-хавэс..." Рашаны пириачья и тэ пхурдэл, дыкхья пал латэ. Матиха заракирдя: "Дыкхава: баро гав... дром... про дром пиралы... дрэ латэ хачёла яг... марла кон-то стуканоса..." "Кузьня, кузьня", - шэптыскирдя росхолясымэ рашаны. "Пашыл тэрдо кхэр", - приракирдя драбакири Матиха, - "ванты парнэ..." "Ёв, ёв - кхэр кузнецоскиро..." "Окэ кон-то джяла кэ ёв", - значительнэс пхэндя э Матиха, тэ инкэ тэлыдыр змэкья шэро ко мусэр... "Кон, кон? - выгыи кокори пэстыр пучья э рашаны. "На дыкхава... калыпэн... На роскэдава кон?..." "Нэ удыкхпэ, удыкхпэ", - теребискирдя рашаны э Мотиха тэло пашварэ, а кокори адякэ жэ лыя тэ задыкхэл дрэ мусэр. "На, нанэ дыкхно", - холяса пхэпдя Матиха. "Приджялапэ тэ драбакирав пирэ глос". "Сыр пирэ глос?" - здивиндяпэ рашаны. "А окэ сыр", - сыклякирдя Матиха. - "Бэш ка про пато машкирал штуба". Рашаны покандыя, бэстя. Э Матиха выґаздыя индыраки э рашанятэ тэ запхандя лэн вэнзлоса про шэро лакэ. "Окэ акана бэш тэ шун", - припхэндя Матиха. Сыр ушунэса глос рашаскири, адякэ и пробага трин молы сыр башно, а коли окоми адава инкэ ушунэса екхвар, то дэ годла: шынг, шынг россыпиныпэ! Адякэ ужэ ёв одохты дрэ глос саро тукэ роспхэнэла". Рашаны со-то кашукэс проракирдя э индыракэндыр, сыр будто э тэлэ гонэндыр. "Нэ, пириячь акана и шун", - пхэндя Матиха. Рашаны пиприачья. Матиха подыкхья прэ рашанятэ, сави бэшты сыр лесовико машкир штуба, тэ ґэрой выгыя аври штубатыр и заухтылдя э скаминдэстыр "тринэнгири". Ґара ужэ звонарё отзвониндя прэ колокольня, а э рашаны са инкэ бэшлы запхандлы дрэ индыраки, сыр дро гоно, и ничи на дыкхи пришундяпэ. Нэ окэ ко само шэро ушундя ёй глос ромэскири. Рашаны скэдыяпэ пхурдыпнаса тэ зоралэс пробагандя башнэса жыко трин молы. "Свэнто, свэнто дэвэл амаро", - пхэндя ёв, сыр сыкадыя рашанякэ трашаны глос ромэскири. "Шынг, шынг пропэр" - задыя годла э рашаны и дажэ набутка подухтя про штэто. Уж со сыс окоми машкир лэндэ дуендэ, э рашастэ рашаняса, Матиха на дыкхья, а токо со авья ёй ко шатра[,] сыр подавья рашай э дэстэса дрэ васта, а палал лэстэ и рашаскирэ писхарья. Дынэ ёнэ годла, розмахиндлэ дэстэнца, кошнэпэ. Страхамэ романэчявэ скэдынэпэ ко шатри. Рашай росхолясымэ дыя годла. "Чёра! Хохаибнаскирэ! Та санпэ прэ манушэндэ!" Страханы адасавэ рэндостыр Матиха выгыя шатратыр тэ кряду прэ пэскири бахт, удыкхья мамуй прогыимэ э кузнецос. На долгэс думиндя ёй, утэрдякирдя лэс, а окоми подгыя ко рашай. "Мро рашай, на дэ годла! На чилав ту амаро рат! Яв ка адарик!" - откхардя ёй рашас дрэ строна. - "Рэндо тукэ пхэнава". Удивисалыя рашай, гыи палэ Матихатэ. Отгыи набут дрэ строна, Матиха сыкадя рашаскэ прэ кузнецостэ. "Тэ драбакирэлпэ кэ мэ кузнецо авья. Патря мангэ ракирна, со ромыы лэскири туса путынэпэ". Дылнякирдо сыс лавэнца Матихакирэнца рашай. На джиндя, со тэ пхэнэл. "Нэ сыр думинэса, тэ чюрдав дро патря кузнецоскэ, аль на?", - фрэнтымаса пучья Матиха. Рома тэ и рашаскирэ писхарья удивисалынэ, коли рашай дыя годла, бутыр сарэндыр, кряду сыр-то загорбиндяпэ тэ пхэндя на холямэс: "Собы адава бутыр тэ на явэл". И сыго ёв угыя. Пал лэстэ розгынэпэ и остатна... Дрэ адая мэнта выгыя кабинетостыр мануш дро парно халато и пиримардя пхуромэскиро роспхэныбэн: - Конэскири очередь ко састякирибнари? - Мири, подухтя пхурором скаминдэстыр и мэкьяпэ кэ порта. - Тэрдёв, тэрдёв! - зарикирдя лэс мануш дро парно халато. Со-то тыро муй джиндло? Ту со, запиян?.. - На! Мэ явьём тэ паракирав састякирибнаскирэскэ. Сыр вастэса злыя ёв. Окэ трито чён на пьява. - Нэ и мишто! На пи бутыр. - И тэ дыкхав на могискирава прэ мортвалы... Мэ ґара адай на сомас. Дэ, дава дума пэскэ, заджява ко састякирибнари и сыкававапэ лэскэ, саво мэ здрово мануш ачьём... - Нэ джя! - Промэкья пхуромэс машуш дро парно халато, савэс обкрэнцындлэ насвалэ мануша, и пученас лэстыр, со кырдяпэ пхурэса. - Ёв сыс баро матымари. Нэ высастякирнас лэс митыбнастыр. - Пхэндя ёв. - Сыр лэс кхарна. А, Бурда... - Бурда? Да ёв ваш пэскэ ґалёв роспхэндя амэнгэ со-то. Сыго выгыя Бурда кабинетостыр барэ радаса про муй. Сарэ подыкхнэ прэ лэстэ барэ якхэнца. - Нэ со пхэндя састякирибнари? - пучья лэстыр мануш дро парно халато. - Пхэндя, со мэ продживава бутыр шэл 6эршэндыр. - Нэ, явэн джидэ! - и пхурором, сыр баро мурш выгыя амбулаториятыр. | |
| Просмотров: 2883 | Рейтинг: 0.0/0 |
| Всего комментариев: 0 | |
